Met vreugde en diep dankbaarheid

Vandag vier ek en manlief ons 43ste huweliksherdenking. Sjoe, dis ‘n leeftyd! Maar net nog ‘n ekstra “sjoe”: ons ken mekaar al amper 65 jaar!

Maar, soos my geliefde opmerk: “She still keeps me guessing!”

In onse geledere is dit ‘n merkwaardige mylpaal wat bereik is. En een waaroor ons met diepe dankbaarheid bewus is van baie, baie genade.

Die klowe en afdraendes en steiltes en opdraendes was daar. Deur die dale en berge en uitdagings was ons nooit alleengelaat nie. Daarvan is ons baie bewus.

En as ons soms ‘n afdraaipaadjie verkeerd gekies het, was daar ‘n stem wat ons teruggeroep het: “Hierdie kant toe is die regte pad!”

Vanaand neem ek vir manlief uit vir aandete om ons saamwees te vier. In nederigheid. Met dankbaarheid.

En mag die humor ons help om die volgende stuk lewenspad nie te ernstig op te neem nie! Meer geniet wat die oomblik ons bied. Die saamwees is so kosbaar!